Regjeringa gir nær 80 millionar til samarbeid med ukrainske universitet; 16 prosjekt får støtte.

Regjeringa gir nær 80 millionar til samarbeid med ukrainske universitet; 16 prosjekt får støtte.

Regjeringa gir nær 80 millionar til samarbeid med ukrainske universitet - regjeringen.no

Regjeringa gir nær 80 millionar til samarbeid med ukrainske universitet

Løyvinga skal styrke ukrainsk høgare utdanning og møte akutte kompetansebehov i arbeidsmarknaden. Slik kan norske aktørar bidra meir effektivt for å støtte den ukrainske motstandskampen og framtidig gjenoppbygging.

Gjennom Nansen EDU får 16 prosjekt støtte i opptil tre år til kompetansebygging som Ukraina treng for motstand og gjenoppbygging. Prosjekta skal styrke samarbeidet mellom norske og ukrainske fagmiljø. Til saman deltek 11 norske og 30 ukrainske universitet og høgskular, i tillegg til andre partnarar.

Viktig for Ukraina – og for Noreg

– Gjennom dette utdanningssamarbeidet investerer vi både i notida og framtida i Ukraina. Utdanning skaper robuste samfunn og motstandskraft. Ho styrker demokratiet, reduserer ulikskap og fattigdom, og fremjar likskap, toleranse og tillit. Alt dette er viktig no og i eit fritt Ukraina, seier utanriksminister Espen Barth Eide (Ap).

– Ukrainske universitet har vist ei imponerande evne til å oppretthalde drifta under svært vanskelege forhold. Gjennom Nansen EDU styrker regjeringa samarbeidet mellom fagmiljø i Ukraina og Noreg, som vil bidra til å utdanne kompetansen som trengst for den langsiktige gjenoppbygginga av landet, seier forskings- og høgare utdanningsminister Sigrun Aasland (Ap).

Aasland peikar òg på at nytteverdien går begge vegar:

– Det er mange sterke fagmiljø i Ukraina, som har gjort seg erfaringar som vil vere viktige for norsk beredskap og teknologiutvikling. Med Nansen EDU får vi til eit nært og praktisk samarbeid som kjem begge landa til gode.

Det har vore svært stor interesse for utlysinga, både frå ukrainsk og norsk side.

– Totalt kom det inn 76 søknader, og så mange som to tredelar av desse er vurderte som svært gode. Vi er også godt nøgde med at det kom søknader frå institusjonar over heile Ukraina, og ein god del av dei prosjekta som fekk støtte har partnarar i område som er særleg råka av krigen, seier Sveinung Skule, direktør i Direktoratet for høgare utdanning og kompetanse.

Det er gitt støtte til prosjekt i alle dei sju tematiske områda i utlysinga. Tyngdepunktet ligg i teknologiske fag og i fysisk og mental helse. Prosjekta spenner frå menneskerettsjuss og journalistikk til vassforsyning, paramedisin, hydrogenteknologi og elektroingeniørfag.

Her kan du sjå oversikt over prosjekta som får støtte

Nansen EDU er eit norsk ukrainsk partnarskapsprogram om høgare utdanning

Nansen EDU finansierer samarbeid mellom høgare utdanningsinstitusjonar i Noreg og Ukraina. Programmet skal støtte ukrainske høgare utdanningsinstitusjonar i å oppretthalde og utvikle god undervisning, samt attraktive og relevante studietilbod innanfor fagfelt som er prioriterte på nasjonalt og

eller regionalt nivå i Ukraina.

Nansen EDU blir forvalta av Direktoratet for høgare utdanning og kompetanse (HK-dir) på oppdrag frå Utanriksdepartementet. Nansen EDU er ein del av Nansen-programmet, eit norsk program med mål om å støtte Ukraina gjennom økonomisk bistand, humanitær hjelp og militær støtte.

Den totale ramma er på 80 millionar kroner over inntil tre år.

Juridiske fag, samfunnsvitskap og økonomisk-administrative fag

Teknologi- og realfag og landbruksfag

Les meir om programmet her