--- title: "Maurus Caflisch, president communal, radunonza communala a Trin dils 11 da mars 2026 decida da reexaminir il project dil santeri; votaziun publica prevista" sdDatePublished: "2026-08-10T12:04:00Z" source: "https://www.trin.ch/wp-content/uploads/2026/08/Protokoll-Gemeindeversammlung-11-03-2026_Romanisch.pdf" topics: - name: "government budget" identifier: "medtop:20000607" - name: "construction and property" identifier: "medtop:20000235" - name: "religion" identifier: "medtop:12000000" locations: - "Switzerland" --- Maurus Caflisch, president communal, radunonza communala a Trin dils 11 da mars 2026 decida da reexaminir il project dil santeri; votaziun publica prevista Protocol Protocol dalla radunonza communala dils 11 da mars 2026 ella halla polivalenta a Trin • Il president communal Maurus Caflisch beneventa 111 persunas all’emprema radunonza communala digl onn 2026. • Igl invit ei vegnius distribuis a termin. La gliesta da tractandas vegn approbada. • Martin Casty e Madlaina Capatt vegnan eligi sco dumbravuschs. Tractandas: 1. Protocol dalla radunonza communala dils 7 da november 2025 2. Protocol dalla radunonza communala dils 11 da december 2025 3. Reexaminaziun dalla decisiun da transformar il santeri da Trin, credit fr. 395'000.- 4. Remplazzament d’in vehichel dil luvratori communal, credit fr. 250'000.- 5. Varia 1. Protocol dalla radunonza communala dils 7 da november 2025 Duront il temps d’exposiziun dils 14 da november tochen ils 14 da december 2025 ein neginas objecziuns entradas. Il protocol vala pia sco approbaus. All’actuara vegn engraziau per sia lavur da redeger il protocol. 2. Protocol dalla radunonza communala dils 11 da december 2025 Duront il temps d’exposiziun dils 31 da december 2025 tochen ils 31 da schaner 2026 ein neginas objecziuns entradas. Il protocol vala pia sco approbaus. All’actuara vegn engraziau per sia lavur da redeger il protocol. 3. Reexaminaziun dalla decisiun da transformar il santeri da Trin, credit da fr. 395'000.- Il president communal introducescha la tractanda. Il tema dalla transformaziun dil santeri fatschenti la vischnaunca gia dapi pli liung temps. Il punct da partenza fuormi la proposta dalla suprastonza alla radunonza communala dils 19 da mars 2025, la quala seigi vegnida approbada cun 49 vuschs GIE, 43 vuschs NA e 7 abstenziuns. Sin fundament da quei resultat seigi la suprastonza communala vegnida incaricada lezza ga da realisar il project. Ina gruppa da votantas e votants seigi denton buca stada d’accord cun il project ed hagi perquei lantschau in’iniziativa. Ils 5 da zercladur 2025 hagi quella inoltrau en total 239 suttascripziuns valeivlas. L’iniziativa pretendi da reexaminar la decisiun dalla radunonza communala dils 19 da mars 2025. Cun l’inoltraziun dall'iniziativa hagi la suprastonza communala sistiu las lavurs vid il project. Alla radunonza communala dils 11 da december 2025 seigi la proposta da reexaminar il project vegnida suttamessa alla populaziun. La radunonza communala hagi decidiu cun 100 vuschs GIE, 39 vuschs NA e 2 abstenziuns d'entrar sin la damonda da reexaminaziun. La radunonza communala dad oz hagi ussa da decider danovamein, schebein il project dueigi vegnir persequitaus vinavon ella fuorma sco el seigi vegnius presentaus oriundamein. Las votantas ed ils votants retuornien aschia alla decisiun d'avon in onn. Sch’ellas ed els approbeschien il project, cuntinueschi la vischnaunca cun la planisaziun e la realisaziun. Sch’il project vegni refusaus, desisti la vischnaunca dalla transformaziun planisada dil santeri; las lavurs da manteniment necessarias vegnien denton a vegnir realisadas vinavon. Sche la radunonza giavischi d’adattar il project, hagi ella la pusseivladad da far ina proposta da refusaziun, aschia che la fatschenta vegni renviada alla suprastonza communala per surluvrar. Sco menziunau el messadi corrispundien las explicaziuns dad oz tal e qual al cuntegn dil project d'avon in onn. Vid il project sez hagien ins fatg neginas midadas, aschia che la radunonza communala decidi oz danovamein davart la medema proposta. La scheffa dil departament Patricia Spreiter presenta la situaziun actuala a maun da maletgs. Ella renda attent als motivs centrals per la realisaziun dil project: engrondir e revaletar la fossa communabla, meglierar ils access alla fossa communabla ed alla baselgia sco era meglierar l’illuminaziun e crear in plaz liber sil prau per occurrenzas ni sentupadas dalla pleiv. Ils cuosts totals dil project muntien a fr. 395'000.-. Quels cumpeglien las lavurs da construcziun, ils indrezs electrics, las lavurs sanitaras, las lavurs da metal, la concepziun dil contuorn, la sulada, ils cuosts da projectaziun e direcziun da construcziun e 5 % per diversas lavurs. Il president communal aschunta che la damonda da baghegiar hagi cunteniu in'adattaziun enviers il project presentaus oriundamein. Il motiv per quella seigien stai ils quitaus e resuns exprimi alla radunonza communala da lezzas uras, surtut davart la realisaziun cun sulada da betun. Ei seigi vegniu projectau da niev ina surfatscha verda supplementara denter la via d'access ed il plaz da sentupada. Il president communal arva la runda da damondas e discussiun. Ina persuna dil comité d'iniziativa pren il plaid per motivar l'iniziativa inoltrada. Sco ins hagi menziunau gia ell’informaziun davart il process formal detti ei la pusseivladad da far ina proposta da refusaziun alla suprastonza communala. Sch’ina maioritad dallas votantas e dils votants suondi quella proposta, vegni il project renviaus alla suprastonza communala per surluvrar. Il comité d'iniziativa propona da renviar il project alla suprastonza communala cun l'incarica da surluvrar quel. El pretenda specialmein ch'il prau dil santeri ella part nord vegni buca surbaghegiaus cun crappa da sulada da betun, mobein resti verds, e ch’il stan actual vegni ton sco pusseivel mantenius. En differentas discussiuns seigi vegniu constatau ch'in liug da sentupada sco quel planisau corrispundi buc als principis d'in santeri, cunquei ch'ei duessi reger leu en emprema lingia ruaus. In tal liug da sentupada savessi disturbar l'atmosfera dil santeri. Plinavon vegn fatg attent ch'ina surfatscha verda seigi era ord vesta ecologica pli preziusa ch'ina surfatscha francada cun sulada da betun. Sco pli impurtont punct vegn la fossa communabla numnada. Quella dueigi vinavon survegnir avunda spazi e vegnir concepida en ina fuorma digna. Il medem mument dueigien las lavurs da sanaziun necessarias vegnir realisadas. La proposta da renviar il project vegn approbada cun 90 vuschs GIE, 18 NA e 3 abstenziuns. Aschia vegn il project renviaus alla suprastonza communala per surluvrar. 4. Remplazzament d’in vehichel dil luvratori communal, credit fr. 250'000.- Il schef dil departament Marco Capatt introducescha la tractanda. Il luvratori communal disponi d’in transporter dalla marca Aebi che seigi vegnius cumpraus igl onn 2013. Cun varga 4'700 uras da menaschi, ed a basa d’in cuoz da veta usitau da ver otg tochen diesch onns, hagi il vehichel daferton contonschiu la fin da siu ciclus da veta. Il transporter vegni duvraus dil luvratori communal per da tuttas lavurs da manteniment e da transport e seigi aschia in cundrez da lavur impurtont. Ils cuosts per cumprar in niev vehichel muntien a fr. 250'000.-. Il president communal arva la runda da discussiun e da damondas. Negin fa diever da quella. La suprastonza communala propona d’approbar il credit per cumprar in niev vehichel per il luvratori communal. La proposta vegn approbada cun gronda maioritad. 5. Varia Il president communal informescha che la proxima radunonza communala hagi liug venderdis, ils 19 da zercladur 2026, e vegni concludida cun in apero. El center da quella radunonza stetti la presentaziun dil quen annual 2025. Il president communal informescha ch’il sboz dalla revisiun dalla constituziun seigi daferton avon maun. La suprastonza communala vegli discutar quei sboz cun la populaziun. Per quei intent organiseschi ella in'occurrenza d'informaziun ils 30 da mars 2026. Quell'occurrenza d'informaziun seigi il medem mument era l’entschatta dall'exposiziun publica da cooperaziun. Aschia veglien ins dar alla populaziun la pusseivladad da sefatschentar cun il cuntegn dalla revisiun dalla constituziun sco era da tschentar damondas e dar resuns. La finamira seigi da presentar il project alla radunonza communala dils 19 da zercladur 2026 e da schar decider en caussa. La suprastonza communala seresalvi denton la pusseivladad da spustar la deliberaziun, tut tenor ils resultats dalla cooperaziun ed eventualas consultaziuns giuridicas necessarias ni sch’ins stuess suttametter il project danovamein ad ina preexaminaziun cantunala. Il schef da departament Hans-Jakob Telli informescha davart il stan dalla meglieraziun generala. La bonitaziun seigi vegnida approbada cun vigur legala. La populaziun vegni informada ils proxims dis cun in’orientaziun a scret a tuttas casadas. Las possessuras ed ils possessurs da terren vegnien plinavon informai directamein en scret e survegnien in questiunari. El rom dalla bonitaziun entscheivi ussa la nova repartiziun dils schischoms. La finamira seigi da risguardar ton sco pusseivel las preoccupaziuns dils pertuccai. Per il territori Planezzas seigien las lavurs vegnidas approbadas e surdadas, aschia ch'ins sappi entscheiver cun la tiarza etappa. La finamira seigi da terminar l'emprema e la tiarza etappa entochen igl atun 2026. Il president communal informescha che la suprastonza rapporti dapi il december digl onn vargau en fuorma resumada davart sia activitad. Quellas informaziuns vegnien publicadas ella gasetta regiunala Ruinaulta sco era sin la pagina-web e sin la tabla nera dalla vischnaunca. Igl intent seigi da meglierar vinavon la communicaziun resp. la transparenza enviers la populaziun. Per finir informescha il president communal davart l'approbaziun dalla revisiun dalla planisaziun locala. Il conclus detagliau vegni publicaus naven da venderdis per prender envesta. Ei detti da principi aunc la pusseivladad da trer vinavon la decisiun alla Dertgira superiura. La suprastonza communala speri denton ch'ei vegni buca fatg diever da quella pusseivladad, per ch'ins sappi scaffir aschi spert sco pusseivel segirtad giuridica. Il president communal dat il plaid allas presentas ed als presents. Dalla populaziun vegn la damonda pertgei ch’ils temps d’avertura dil recicladi seigien vegni adattai sin igl 1. d’avrel 2026. Quell’adattaziun dils temps d’avertura seigi cuntraproductiva. Il capoluvrer informescha ch'ils temps d'avertura d'entochen ussa seigien stai ils davos siat onns adina tuttina. En quei temps seigien adina puspei vegnidas propostas dalla populaziun per adattar ils temps d'avertura. Cun l'adattaziun previda dad arver la mesjamna da niev dallas 16.00 entochen las 18.00 (entochen ussa dallas 15.00 entochen las 17.00) vegli la vischnaunca cunzun vegnir encunter allas persunas che lavuran. La vischnaunca seigi pertscharta ch'ils temps d'avertura adattai seigien buc ideals per tuttas persunas e ch’ei detti differents meinis en quei connex. In'ulteriura amplificaziun dils temps d'avertura seigi denton per motivs da resursas pil mument buca pusseivla. Ina persuna dil ravugl dalla radunonza communala vul saver, cura che la zona da tempo 30 vegni introducida el vitg. Il president communal informescha che l'introducziun dalla zona da tempo 30 seigi gia vegnida approbada igl atun 2025 e las lavurs seigien vegnidas surdadas. Muort las ferdaglias hagien las signalisaziuns (colur) aunc buca saviu vegnir realisadas. Aschiprest che l'aura lubeschi, vegnien las marcaziuns fatgas. In’autra persuna vul saver, sche la vischnaunca hagi uss introduciu il pagament cun TWINT el luvratori communal. Il president communal confirmescha quei. In’ulteriura persuna damonda, sch’ei seigi previu d'introducir il pagament cun TWINT era ell'administraziun communala. Il president communal informescha che l'administraziun communala seigi actualmein en ina fasa da transformaziun informatica. El rom da quella seigi ei era previu d'introducir pusseivladads da pagar cun agid d’in terminal da pagament inclusiv TWINT. La realisaziun vegni denton aunc a duvrar empau temps. Fin dalla radunonza: 21.00 Trin, ils 11 da mars 2026 Il president communal: L’actuara: Maurus Caflisch Olivia Buonvicini