Il chantun Grischun va en consultaziun per la Lescha d’uffants e da giuvenils dal Grischun; base legala cumplessiva per promoziun d’uffants e giuvenils
La Lescha d’uffants e da giuvenils dal Grischun va en consultaziun
Communicaziuns Communicaziuns Chanzlia chantunala Tschertga en l’archiv 2026 Communicaziuns Polizia chantunala
Communicaziuns Chanzlia chantunala Tschertga en l’archiv 2026
La Lescha d’uffants e da giuvenils dal Grischun va en consultaziun
Il chantun Grischun vul promover pli sistematicamain ils uffants e giuvenils, rinforzar lur participaziun e contribuir a lur protecziun. La Regenza ha deliberà per la consultaziun il sboz per ina Lescha d’uffants e da giuvenils dal Grischun (LUG). Cun quai survegn il chantun per l’emprima giada ina basa legala cumplessiva per la promoziun e participaziun d’uffants e giuvenils ordaifer la scola.
En tut las regiuns dal chantun duain ils uffants e giuvenils pudair sa sviluppar bain e vegnir accumpagnads en lur integraziun sociala e politica. Entant che la furmaziun, il sport, la cultura e la sanadad èn regladas tras lescha, manca ina basa giuridica per il sectur da la promoziun e participaziun ordaifer la scola sco er per tscherts puncts da la protecziun d’uffants e giuvenils. La LUG serra questa largia. Ella sa drizza a tut ils uffants e giuvenils ed a tut las persunas giuvnas creschidas fin 25 onns, ch’èn domiciliads en il chantun Grischun. Ils giavischs ch’ils giuvenils han fatg valair en workshops la primavaira 2025 , èn vegnids integrads en quest sboz.
Promover purschidas d’organisaziuns privatas e da vischnancas En il senn d’ina politica d’uffants e da giuvenils persistenta duai vegnir francà en la lescha, ch’il chantun po conceder contribuziuns a purschidas ed a projects d’organisaziuns privatas en il sectur da la promoziun e participaziun ordaifer la scola. Er las vischnancas pon vegnir sustegnidas cun contribuziuns chantunalas per stabilir e sviluppar vinavant mesiras correspundentas. La LUG rinforza uschia la collavuraziun tranter il chantun, las vischnancas e las organisaziuns privatas. Il chantun surpiglia la planisaziun strategica e la coordinaziun e metta a disposiziun purschidas da cussegliaziun per vischnancas e per organisaziuns.
Rinforzar la protecziun d’uffants e da giuvenils En il sectur da la protecziun d’uffants vegn francà permanentamain il Post spezialisà per la protecziun d’uffants cun l’ instrument da lavur Cumpass . Il project da pilot respectiv ha mussà, ch’igl exista in basegn per ina purschida da cussegliaziun nunbirocratica. Persunas spezialisadas e da referiment che han in contact regular cun uffants e giuvenils survegnan uschia in post da consultaziun nunbirocratic, per pudair constatar a temp periclitaziuns dal bainstar da l’uffant e per pudair agir en moda adequata. Cumplementarmain po il chantun conceder contribuziuns ad organisaziuns privatas a favur da posts da consultaziun e da cussegliaziun, ch’èn accessibels per telefon u online, per uffants, giuvenils, geniturs ed autras persunas da referiment sco er a favur da purschidas da prevenziun e da sensibilisaziun per la protecziun d’uffants e da giuvenils.
Ils documents da consultaziun èn ussa publitgads La consultaziun dura dals 13 d’avust 2026 fin ils 13 da november 2026 e vegn realisada sin via digitala sco uschenumnada e-consultaziun. Persunas privatas ed organisaziuns pon inoltrar lur posiziuns directamain sur la plattafurma e-mitwirkung.gr.ch .
Cusseglier guvernativ Marcus Caduff, schef dal Departament d’economia publica e fatgs socials, e‑mail Marcus.Caduff@dvs.gr.ch
Las dumondas vegnan coordinadas dad Nadja Cadonau, responsabla per la communicaziun dal Departament d’economia publica e fatgs socials, tel. +41 81 257 44 60, e‑mail Nadja.Cadonau@dvs.gr.ch