Ornold Bazaj dhe Speleotours eksplorojnë shpella në Velçë të Vlorës, Shqipëria sot; dhjetë vizitorë me pajisje sigurimi
Ornold Bazaj dhe Speleotours eksplorojnë shpella në Velçë të Vlorës, Shqipëria sot; dhjetë vizitorë me pajisje sigurimi Turizmi i shpellave: eksplorimi i miliona viteve histori në Vlorë | EEAS Turizmi i shpellave: eksplorimi i miliona viteve histori në Vlorë Rruga nga Vlora për në fshatin Velçë gjarpëron mes gjelbërimit të harlisur, duke zbuluar, kthesë pas kthese, vargmale, fusha, bagëti që kullosin dhe oborre shtëpish plot lule. Në krye të fshatit ndodhet një nga shpellat më të mëdha të zonës, e njohur si Shpella Kala. Banorët tregojnë me krenari se ajo është e lashtë, duke vënë në dukje se, para luftës, arkeologu italian Luigi Cardini zbuloi vegla prehistorike prej guri dhe kocke në brendësi të saj. Të dashur dhe mikpritës, ata theksojnë se zona është e pasur me shpella me madhësi dhe forma të ndryshme. Shumë prej tyre besojnë se dy shpellat kryesore, Kalaja dhe Maçi, janë të ndërlidhura, megjithëse kalimi midis tyre ende nuk është zbuluar. Megjithatë, hyrja kërkon praninë e një speleologu, jo vetëm për të garantuar sigurinë, por edhe për të identifikuar kalimet që mund të çojnë drejt njërës prej daljeve të shpellës. Shtegu nis me një ngjitje të pjerrët dhe që nga hyrja mund të shihet në largësi fshati, çka ofron një panoramë marramendëse. ...